Isa 55 | ZomZIV | STEP | No a dangtakte khempeuh aw, hong pai un, tui hong zuan un; no sum nei lote aw, hong pai-in lei unla ne un! Hong pai unla sum pia lo man nei loin bawngnawi le lenggahzu lei un.

Isaiah 55

A Dangtakte Sapna

1 No a dangtakte khempeuh aw, hong pai un, ^a
tui hong zuan un; ^b
no sum nei lote aw,
hong pai-in lei unla ne un! ^c
Hong pai unla sum pia lo man nei loin
bawngnawi le lenggahzu lei un. ^d
2 Anlum leina loin bang hangin sum zanga,
gilvahna ding lopi-in na sem na hi uh hiam? ^e
Ngai un, ka thu ngai-un, anlim ne un, ^f
na hinna un anlim pen ne-in a tai ding hi.
3 Na bil uh hong ngat unla kei hong zuan un;
na nuntak theih nadingun ka thu ngai un. ^g
David tungah a muanhuai itna ka ciam bangin
note tawh tawntung thukhun ka bawl ding hi. ^h
4 En un, mite tungah amah teci suaksakin
mite makai le ukpa ka hisak ding hi.
5 Note in na theih loh uh minamte na sam ding uh a,
TOPA note Pasian Israel-te Siangtho Pa in ⁱ
note hong thupisak khin ahi manin ^j
note hong thei lo minamte in ^k
kintakin note hong zuan taktak ding uh hi.
6 A kimuh theih lai-in TOPA zong un, ^l
amah a nai lai-in sam un.
7 Tatsiapa a gamtat nusiasak unla,
a gilopa a lungsim kheelsak un; ^m
TOPA lamah kiheisak le uh cin amah in lainat dinga, ⁿ
eite Pasian lamah na kiheisak uh leh amah in a mawhna maisak pha mahmah ding hi. ^o
8 “Ahang in, no ngaihsutte kei ngaihsutna hi lo a, ^p
no zialetongte kei zialetongte a hi kei hi,” ^q

TOPA in cikhia hi.
9 “Leitung sangin vante a sanzawk bangin ^r
no zialetongte sangin kei zialetongte sangzaw a,
no ngaihsutnate sangin kei ngaihsutna sangzaw hi. ^s
10 Khaici vawhpa khaici ding le
a ne pa anlum ding
a piansak theih nadingin ^t
vantung panin guah le vuk kiasuka,
leitung buakkawtin kungnote mengin ^u
selsak loin a kileh loh bangin
11 ka kam pana pusuaksa ka kammal zong tua bang ahi hi; ^v
a hawmin kei kiangah hong kileh lo dinga, ^w
ahi hangin ka deih bangin
tungsakin ka sawlna ah lawhcing ding hi. ^x
12 Gual nuamin na kuankhia ding uh a, ^y
lungnuamin hong kipaikhiatpih ding hi;
note mai-ah mualliante le mualneute
la sa in awng ding uh a, ^z
lo lai-a singkung khempeuh in
khut beng ding uh hi. ^aa
13 Lingkung tangin takkung po dinga
thangling kung tangin muikung a po ding hi. ^ab
Hih in a tawntunga
TOPA kiphawkna ^ac
a kisusia ngei lo a kipden lim hi ding hi.